saleem

saleem

Write on புதன்கிழமை, 09 ஜனவரி 2019
Write on செவ்வாய்க்கிழமை, 25 டிசம்பர் 2018
Write on திங்கட்கிழமை, 24 டிசம்பர் 2018

புறக்கணிக்கப்பட்ட, கைவிடப்பட்ட, துரத்தப்பட்ட பாரம்சுமந்த பெற்றோர்கள் மற்றும் முதியோர்களின் அவலக் கதைகள் வீதிகள் தோறும் அதிகரித்து வருகிறது. அவர்களில் பலர் நம் கண்களில் படுவதுமில்லை. அவர்களின் அழுகுரல்கள் நாள்தோறும் நம்மைச் சுற்றி ஒலித்துக் கொண்டே இருக்கிறன அவைகள் நம் செவிகளைத் தொடுவதுமில்லை. வீதிக்கு வந்தவைகளே நமக்கு சாட்சியாகின்றன. 

நாளுக்கு நாள் பிள்ளைகளால் புறக்கணிக்கப்பட்டு முதியோர் இல்லங்களில் சேர்க்கப்படும் பெற்றோர்கள், வயோதிகர்களின் எண்ணிக்கை பொதுச்சமூகத்திலும் முஸ்லிம் சமூகத்திலும் அதிகரித்து வருகிறது.
இது போன்ற காட்சிகளை கண்கள் எதிர்கொள்ளும்போது, இது சார்ந்த துயரக்கதைகளை செவியேற்கும்போது நம் இதங்களில் இரக்கத்திற்கு இடமளித்து விடக்கூடாது என்ற அரக்கச் சிந்தனை நம்மை ஆக்ரமித்து வருகிறதோ என்ற அச்சம் உள்ளத்தை நிம்மதியிழக்கச் செய்கிறது.

பெற்றோர்கள், முதியவர்கள் விசயத்தில் முஸ்லிம் சமூகம் கைவிட்டு வருகிற, கவனத்தில்கொள்ள வேண்டிய பல அம்சங்கள் உள்ளன.

1. அடிப்படையில் இஸ்லாம் முதியோர் இல்லங்கள் என்ற நடைமுறையை வரவேற்பதில்லை. இஸ்லாமிய சமூக அமைப்பில் வீட்டுச் சூழலில் ஒருவர் மரணம் வரைக்கும் சகல உரிமைகளையும் பெற்று வாழ்வதற்கான ஏற்பாடுகள் இருக்கின்றன.
2. இஸ்லாம் பெற்றோர்களை துன்புறுத்துவதை இறைவனுக்கு இணைவைப்பதற்கு அடுத்த பெரும் பாவமாகக் கருதுகிறது. உதவி உபகாரம் செய்வது (இஹ்சான்), இங்கிதமாகப் பேசுவது (கவ்லுன் கரீம்) விரட்டாதிருப்பது (நஹர்), சீ என்று கூட(உஃப்ஃபின்) கூறாதிருப்பது, பணிந்து குனிந்து (கப்ளுள் ஜனாஹ்) நடந்து கொள்வது, அவர்களுக்காக (ரப்பிர்ஹம் ஹுமா) பிரார்த்திப்பது போன்றவை பெற்றோர்களுக்கான பிள்ளைகளது கடமைகளாகும்.
3. தற்கால உலகில் பெற்றோர்களை அலட்சியம் செய்பவதில் பாமரர்களை விட படித்துப் பட்டம் பெற்றவர்களும், பகட்டு வாழ்க்கை வாழ்பவர்களும்தான் அதிகம் என்பதை அறிய முடிகிறது. இது ஆன்மீகத்தை புறக்கணித்த இன்றைய சடவாதக் கல்வி மற்றும் வாழ்க்கையின் கோளாறு.

4. பிள்ளைகள் இல்லாத பெற்றோர் மற்றும் முதியவர்களை பராமரிக்கும் பொறுப்பு நெருங்கிய மற்றும் தூரத்து உறவினர்களுக்குச் செல்லும். அது இஸ்லாத்தில் ”சிலதுர் ரஹ்ம்” - இனபந்துக்களது உறவைப் பேணி வாழ்வது - என்ற சொல்மூலம் உணர்த்தப்படுகிறது. நெருங்கிய மற்றும் தூரத்து உறவினர்கள் இல்லாத போது அது ஊரார் மற்றும் சமூகத்தின் பொறுப்பாக மாறும். அதாவது அது கூட்டுப் பொறுப்பாக மாறும். ஒரு முதியவர் எவருமே கவனிக்காத நிலையில் விடப்படும் போது அது முழு சமூகத்தின் பெரும் பாவமாகவே கருதப்படும்.

5. மனிதாபிமான உறவு : முஸ்லிம் சமூகத்தில் மட்டுமல்ல ஏனைய சமூகங்களிலும் உள்ள முதியோர்களின் குறைபாடுகள் தீர்க்கப்பட வேண்டும்.
உமர் இப்னு அப்தில் அஸீஸ்(ரஹ்) அவர்கள் பஸ்ராவில் இருந்த தனது கவர்னருக்கு பின்வருமாறு கடிதம் எழுதினார்: ”அஹ்லுத் திம்மாக்களில் (அதாவது முஸ்லிம் அரசின் பாதுகாப்பில் வாழும் முஸ்லிம் அல்லாத குடிமக்களில்) எவராவது முதிர்ந்த வயதை அடைந்து, அவரது உடல் பலவீனமுற்று, தொழில் வாய்ப்புக்கள் இல்லாத நிலை உருவாகிவிட்டால் அவருக்கு தேவையான அளவு உதவியை முஸ்லிம்களது பைதுல் மாலில் இருந்து பெற்றுக் கொடுங்கள்.” (கிதாபுல் அம்வால்-அபூஉபைத் , பக்:46)
எனவே, அனைவரும் அல்லாஹ்வின் படைப்புக்கள் மனிதர்கள் என்ற வகையில் முதியோர்களுக்கான நமது சேவைகள் மதம், இனம், மொழி என்ற எல்லைகள் தாண்டிச் செல்ல வேண்டும்.
இறைவனை அறிமுகம் செய்யாத, அனைத்தையும் விட சொந்த நலனே முக்கியம் என்பதை மனித சிந்தனையிலும், மனங்களிலும் திணிக்கும் சடவாதக் கல்வியும், வாழ்க்கை முறையும் மாற்றப்படாதவரை மனித மனங்களில் விசாலம் ஏற்பட வாய்ப்பில்லை.
இறைவன் வழங்கிய இஸ்லாமிய வாழ்வியல் சிந்தனை முஸ்லிம் சமூகத்தில் குழந்தைகள் முதல் பெரியவர்கள் வரை அனைவருக்கும் கல்வியாக பயிற்றுவிக்கப்படுவதே மனித மனங்களை விசாலப்படுத்தும். அதுவே நமது பாரங்களை இலேசாக்கும்.

Write on புதன்கிழமை, 21 நவம்பர் 2018

“என் பாட்டி (இந்திரா காந்தி) கொல்லப்பட்டார். என் தந்தை (ராஜீவ் காந்தி) கொல்லப்பட்டார். இப்போது, நானும் ஒரு நாள் கொல்லப்படலாம். ஆனால், அதற்கு நான் அஞ்சவில்லை. அதைப் பற்றி கவலைப்படவும் இல்லை. முசாபர்நகர் மக்களின் துயரத்தில் என் முகத்தைப் பார்க்கிறேன். அரசியல் கட்சிகளால்தான் கோபம் தூண்டப்படுகிறது. அதனால்தான் பாஜகவையும், அதன் அரசியலையும் எதிர்க்கிறேன். அரசியல் ஆதாயத்துக்காக, மக்களைக் காயப்படுத்தும் பாஜகவின் அரசியலை எதிர்க்கிறேன். அவர்கள் முசாபர் நகருக்குச் சென்று தீ மூட்டுவார்கள். அவர்கள் குஜராத்துக்குச் சென்று தீ மூட்டுவார்கள். உத்தரப் பிரதேசத்திலும் காஷ்மீரிலும் அதையே செய்வார்கள். நாம் அந்தத் தீயில் சிக்கிவிடக் கூடாது. இந்தியா ஒற்றுமையுடன் நிற்க வேண்டும். பாஜக மக்களைப் பிரிக்கிறது. ஆனால், இந்தியா ஒற்றுமையுடன் இருக்க வேண்டும் என்றுதான் நான் விரும்புகிறேன்.

Write on புதன்கிழமை, 21 நவம்பர் 2018

ரிசர்வ் வங்கி என்பது சுயாட்சி கொண்ட சுதந்திரமான அமைப்பு. ஆனால், சமீபகாலமாக மத்திய அரசு ரிசர்வ் வங்கியின் சுதந்திரத்தை மதிப்பது இல்லை. விரைவாகவோ அல்லது கால தாமதமாகவோ சந்தையில் மிகப்பெரிய பொருளாதார பெருந்தீ பற்றிக்கொண்டு சேதத்தை உருவாக்கும், அப்போது, இந்த சுதந்திரமான இந்த ரிசர்வ் வங்கியின் முக்கியத்துவத்தை உணர்வார்கள். சட்டத்தை மீறி மத்திய செய்யும் தவறுகளுக்கும், பாவங்களுக்கும் நிச்சயம் விலை கொடுக்க வேண்டியது இருக்கும்.

Write on திங்கட்கிழமை, 24 டிசம்பர் 2018

சிறைச்சாலைகளில் இருக்கிற முஸ்லிம்களின் எண்ணிக்கை முன்னெப்போதும் இல்லாத அளவுக்கு இந்தியாவில் அதிகரித்திருக்கிறது. இந்திய மக்கள் தொகையில் 14.2% பேர் முஸ்லிம்கள் என்கிறது 2011 மக்கள் தொகை கணக்கெடுப்பு. இந்தியச் சிறைகளில் அடைக்கப்பட்டிருப்பவர்களில் 15.8% பேர் முஸ்லிம்கள் என்கிறது ஒரு ஆய்வு. முஸ்லிம் சிறைவாசிகளில் 21% பேர் தண்டிக்கப்பட்ட கைதிகள்.

காவல் துறையால் கைது செய்யப்பட்டு குற்றம்சாட்டப்படுகிற கணிசமான முஸ்லிம்கள்தான் அவற்றைச் செய்தார்கள் என்பதற்குப் போதுமான ஆதாரங்கள் இல்லை என்று நீதிமன்ற விசாரணையில் அவர்கள் விடுவிக்கப்படுகின்றனர் என்பதை இது காட்டுகிறது. ஆனால்,, அதற்குள் பல ஆண்டுகள் ஓடிவிடுகிறது. பத்தாண்டுகள் வரை சிறையில் வாடியவர்கள் உண்டு.
தண்டிக்கப்பட்டவர்களுக்கும் குற்றம்சாட்டப்பட்டவர்கள் விடுவிக்கப்படுவதற்கும் இடையே இடைவெளி இருக்கிறதே, அது காவல் துறையினரின் மத்தியில் உள்ள பாரபட்சத்தை மட்டும் காட்டவில்லை. நமது நீதித் துறையில் தொழில்முறை நிபுணத்துவம் இல்லை என்பதையும் அது காட்டுகிறது.
நீதித் துறையின் கீழ்மட்டத்துக்கு போகும்போது தொழில்முறை நிபுணத்துவம் குறைவதை ஒருவர் பார்க்கலாம்.
மோஷின் ஷேக் படுகொலை தொடர்பான நீதிமன்ற விசாரணை ஒரு பாடம். புனே நகரைச் சேர்ந்த 24 வயதான அந்த கம்ப்யூட்டர் இன்ஜினீயர் மசூதியிலிருந்து வீடு நோக்கி வந்துகொண்டிருந்தார். சமூக வலைதளங்களில் மராத்திய மன்னர் சிவாஜி, சிவசேனா கட்சியின் நிறுவனர் பால் தாக்கரே தொடர்பான தரக்குறைவான படங்களைப் போட்டதை கண்டித்து இந்து ராஷ்ட்டிர சேனா என்ற அமைப்பு அந்த நேரத்தில் பேரணி நடத்திக்கொண்டிருந்தது. பேரணியில் சென்றுகொண்டிருந்த சுமார் 20 பேர் கொண்ட கும்பல் அவரைத் தாக்கியது.
முஸ்லிம் போல தோற்றமளித்ததால் மோஷ்ஹின் தாக்கப்பட்டதாக நீதிமன்றம் கருதியது. அவரைத் தாக்கிய 23 பேர் கைது செய்யப்பட்டனர். அவர்கள் மீது கொலைக்குற்றம் சாட்டப்பட்டது.
குற்றம்சாட்டப்பட்டவர்கள் பரோலில் செல்வதற்கு அனுமதி கோரினார். மோஷினின் மதத்தின் காரணமாக அவர்கள் தூண்டப்பட்டார்கள் என்ற அடிப்படையில் மும்பை உயர் நீதிமன்ற நீதிபதி அவர்களுக்கு அனுமதி அளித்தார்.
கொல்லப்பட்டவருக்கும் குற்றம்சாட்டப்பட்டவர்களுக்கும் இடையில் தனிப்பட்ட விரோதம் எதுவும் இல்லை. கொல்லப்பட்டவர் வேறு ஒரு மதத்தைச் சேர்ந்தவர் என்பதுதான் அவர் செய்த தவறு. இந்த அம்சத்தைக் குற்றம்சாட்டப்பட்டவர்களுக்குச் சாதகமாக நான் கணக்கில் எடுத்துக்கொள்கிறேன் என்றார் அந்த நீதிபதி.
கொல்லப்பட்டவரின் குடும்பத்தினர் உச்ச நீதிமன்றத்தில் மேல் முறையீடு செய்தனர். அது உயர் நீதிமன்றத்தின் தீர்ப்பை ரத்து செய்தது. கொல்லப்பட்டவர் குறிப்பிட்ட மதத்தைச் சேர்ந்தவராக இருப்பது அவர் மீது தாக்குதல் நடத்தப்பட்டு அவர் கொல்லப்பட்டதற்கான நியாயப்படுத்தலாக இருக்க முடியாது என்றது அது. பல்வேறு சமூகங்களின் உரிமைகள் பற்றிய பிரச்சினையை எதிர்கொள்ளும்போது நாட்டின் பன்முகத்தன்மை பற்றிய முழுமையான புரிதலோடு கீழ்நிலை நீதிமன்றங்கள் இருக்க வேண்டும் என்றும் அது அறிவுறுத்தியது.
நீதித் துறையின் உச்சியாக இருக்கிற நீதிமன்றம் இத்தகைய அறிவுறுத்தலைத் தர வேண்டியிருக்கிறது என்பது முஸ்லிம்களுக்கு எதிரான பாகுபாடு எந்த அளவுக்கு நாட்டின் கட்டமைப்பில் ஊடுருவியிருக்கிறது என்பதை வெளிப்படுத்துகிற சான்றாக நிற்கிறது.
மாநிலங்களில் உள்ள உயர் நீதிமன்றங்களில் நிலவுகிற பாகுபாட்டு உணர்வுகளுக்கு எதிராக முஸ்லிம்களைக் காத்து நிற்பதில் உச்ச நீதிமன்றத்துக்கு ஒரு வரலாறே இருக்கிறது. உத்தரப் பிரதேசத்தின் அலகாபாத் உயர் நீதிமன்றம் அயோத்தி வழக்கு விவகாரத்தில் சர்ச்சைக்கிடமான தீர்ப்பை 2010இல் வழங்கியது. முஸ்லிம்களின் வஃக்ப் வாரிய சொத்துகள் உரிய கட்டிட விதிமுறைகளின்படி கட்டப்படவில்லை என்று 2018இல் தீர்ப்பளித்தது. இரண்டிலுமே தனிப்பட்ட கருத்துகளின் அடிப்படையில் அவை அமைந்தன.
அந்தத் தீர்ப்புகளை பாஜக அரசாங்கம் நிறைவேற்றுவதற்கு முன்பாக உச்ச நீதிமன்றம் தடை விதித்தது. சிறுபான்மையினரின் கல்வி நிறுவனங்களுக்கு உதவ உச்ச நீதிமன்றம் தலையிட வேண்டிவந்தது. சிறுபான்மையினர் கல்வி நிறுவனங்களுக்கான தேசிய கவுன்சிலும் தப்பவில்லை. சிறுபான்மையினர் கல்வி நிறுவனம் என்கிற அந்தஸ்து கோரி விண்ணப்பிக்கிற அமைப்புகளை ஆய்வு செய்து முடிவு செய்வதே இந்த கவுன்சிலின் நோக்கம். 2004இல் மன்மோகன் சிங் அரசாங்கத்தால் உருவாக்கப்பட்ட இந்த கவுன்சில் இயங்க முடியுமா என்ற அபாய கட்டத்துக்குத் தற்போது வந்துவிட்டது.
இந்த கவுன்சில் உருவாக்கப்பட்டதிலிருந்து 2017 வரையில் 13,331 கல்வி நிறுவனங்களுக்கு ‘சிறுபான்மையினர் நிறுவனம்’ என்ற அந்தஸ்தை வழங்கியிருக்கிறது. கடைசியாக அதன் தலைவராக செயல்பட்டவர் நீதிபதி எம்எஸ்ஏ சித்திக். அவர் 2014இல் பதவியை ராஜினாமா செய்துவிட்டார். அதற்குப் பிறகு யாரும் அந்தப் பதவிக்கு நியமிக்கப்படவில்லை.
இந்த கவுன்சில் எடுத்த முடிவுகளை எதிர்த்து கொல்கத்தா உயர் நீதிமன்றத்தில் வழக்கு போடப்பட்டது. 2018 ஏப்ரலில் உச்ச நீதிமன்றத்துக்கு முறையீடு செய்யப்பட்டபோது கவுன்சில் எடுத்த முடிவுகளை அது உறுதி செய்தது. மத மற்றும் மொழிச் சிறுபான்மையோருக்கு இந்திய அரசியல் சாசனம் வழங்குகிற உரிமைகளை மீண்டும் வலியுறுத்துவதற்கான வாய்ப்பாகவும் இதை உச்ச நீதிமன்றம் பயன்படுத்திக்கொண்டது.
பெரும்பான்மைக் கண்ணோட்டம் உயர் நீதிமன்றங்களில் நடைமுறையில் இருப்பது என்பது நீதித் துறையில் இஸ்லாமியர்களின் பங்கேற்பு குறைவாக இருப்பதோடு இணைந்திருக்கிறது.
2010ஆம் ஆண்டிலிருந்து ஹைதராபாத் உயர் நீதிமன்றம் தவிர, மற்ற உயர் நீதிமன்றங்களில் உள்ள நீதிபதிகளில் அந்தந்த மாநிலங்களில், இஸ்லாமியர்களின் மக்கள்தொகை விகிதத்துக்கு மிகவும் குறைவான விகிதத்திலேயே முஸ்லிம்கள் நீதிபதிகளாக உள்ளனர்.
ஹைதராபாத் மற்றும் ஜம்மு காஷ்மீர் உயர் நீதிமன்றங்களைத் தவிர மற்றவற்றில் இந்த எண்ணிக்கை காலப்போக்கில் குறைந்துகொண்டே வந்திருக்கிறது.
மேற்கு வங்கத்தில் 1991இல் முஸ்லிம் நீதிபதிகள் 25% பேர் இருந்தனர். அது 2011இல் எட்டு சதவீதமாகக் குறைந்துள்ளது. ஆனால், இதே காலத்தில் மேற்கு வங்கத்தின் முஸ்லிம் மக்கள்தொகை 23.6%இலிருந்து 27 %ஆக உயர்ந்து வந்திருக்கிறது.
கர்நாடக உயர் நீதிமன்றத்தில் 1961இல் 67% முஸ்லிம்கள் இருந்தனர். 2011இல் அதுவே 2.9% ஆகக் குறைந்துவிட்டது. அதே நேரத்தில் கர்நாடகத்தில் முஸ்லிம் மக்கள்தொகை சதவீதம் 9.87இலிருந்து 12.9 ஆக உயர்ந்துவிட்டது. இதே காலகட்டத்தில் மத்தியப் பிரதேசத்தின் ஜபல்பூர் உயர் நீதிமன்றத்தில் முஸ்லிம் நீதிபதிகளின் எண்ணிக்கை 14.3% இலிருந்து 2.9% ஆகக் குறைந்துள்ளது. மத்தியப் பிரதேசத்தில் அதே காலகட்டத்தில் முஸ்லிம்கள் மக்கள் தொகை சதவீதம் 4இலிருந்து 6.6 ஆக அதிகரித்துள்ளது.
இதே கதைதான் பாட்னாவிலும். 1951இல் 25% முஸ்லிம் நீதிபதிகள் இருந்தார்கள். 2011இல் அதுவே 5.4 ஆக குறைந்துள்ளது. அதே நேரத்தில் பிஹார் மாநிலத்தின் மக்கள்தொகையில் முஸ்லிம்களின் சதவீதம் 12.45இலிருந்து 16.9 ஆக உயர்ந்துள்ளது.
உச்ச நீதிமன்றத்திலும் இத்தகைய போக்குதான் உள்ளது. 1950களில் உச்ச நீதிமன்றத்துக்கு நியமிக்கப்பட்ட 24 நீதிபதிகளில் நான்கு பேர் முஸ்லிம்கள் (16.6%). 60 களில் நியமிக்கப்பட்ட 16 நீதிபதிகளில் எவரும் முஸ்லிம் இல்லை. 70களில் இருந்த 26 நீதிபதிகளில் இருவர்தான் முஸ்லிம்கள். 80களில் இருந்த 33 நீதிபதிகளில் நான்கு பேர்தான் (12%) முஸ்லிம்கள்.
1980களுக்குப் பிறகு உச்ச நீதிமன்ற நீதிபதிகளில் முஸ்லிம்களின் சதவீதம் குறைகிற அதேநேரத்தில் நியமிக்கப்படுகிற முஸ்லிம் நீதிபதிகளின் எண்ணிக்கை அதிகரித்துவந்திருக்கிறது. 90களில் இருந்த 40 நீதிபதிகளில் மூன்று பேர், 2000களில் இருந்த 49 பேரில் 2 பேர், 2010 -லிருந்து இருக்கிற 40 பேரில் மூன்று பேர். ( 2012இல் எம்ஒய். இக்பால் மற்றும் எப்எம். இப்ராஹிம் ஆகியோரும் 2017இல் எஸ்எம்.அப்துல் நஜீர் ஆக மூன்று பேர்)
2018 முன்பாக உச்ச நீதிமன்றத்துக்கு நியமிக்கப்பட்டுள்ள 229 நீதிபதிகளில் 18 முஸ்லிம்கள் நியமிக்கப்பட்டுள்ளனர். இந்திய மக்கள் தொகையில் 14.2% இருக்கிற முஸ்லிம்களுக்கு உச்ச நீதிமன்றத்தில் எட்டு சதவீதத்துக்கும் குறைவாகவே பிரதிநிதித்துவம் கிடைத்துள்ளது என்பதுதான் மொத்தத்தில் நாம் புரிந்துகொள்ளவேண்டியது.
முஸ்லிம்களின் பங்கேற்பு மேலும் மேலும் குறைந்து வருகிற நிறுவனங்களான மாநில சட்டப்பேரவைகள், காவல் துறை, ராணுவம், அரசு நிர்வாகம் ஆகியவற்றின் வரிசையில் உயர் நீதிமன்றங்களும் சேர்ந்துவிட்டன . உச்ச நீதிமன்றத்தைப் பொறுத்தவரையில் அத்தகைய நிலைமையை நோக்கிப் போய்க்கொண்டிருக்கிறது என்பதை மேற்கண்ட எண்ணிக்கை விவரங்கள் காட்டுகின்றன.
மிக முக்கியமானதொரு அமைப்பில் இந்தியாவின் மிகப் பெரிய சிறுபான்மை இனத்தின் பிரதிநிதித்துவம் எப்படி இருக்கிறது என்பதை இந்த எண்ணிக்கை விவரங்கள் காட்டுகின்றன.
வெவ்வேறு மதங்களைச் சேர்ந்தவர்கள் புரியும் ஒரே விதமான குற்றங்ங்களுக்கு வேறுபட்ட தண்டனைகள் வழங்கப்படுகின்றன . மேலும் அதிகமான முஸ்லிம் , தலித் நீதிபதிகள் பதவிகளில் இருந்தால் இத்தகைய போக்கு குறையும் என்று ஒருவர் வாதிடலாம் . ஆனால், இதனால் குற்றம் சாட்டப்பட்டிருக்கிற முஸ்லிம்களின் பிரச்சினை தீரும் என்றோ மாவட்ட நடுவர் மட்டத்தில் முஸ்லிம்களுக்கு நியாயமான பிரதிநிதித்துவம் கிடைத்தால் அவர்களும் மற்றவர்களுக்கு சமமாக வாதாடி தங்களது வழக்குகளிலிருந்து தங்களைப் பாதுகாத்துக்கொள்வார்கள் என்றோ இந்த நிலைமைகளிலிருந்து நாம் முடிவுக்கு வரக் கூடாது.
உயர் சாதிகளைச் சேர்ந்த ஆண்களும் நீதிபதிகளின் வாரிசுகளும் கலந்த முறையில் உச்ச நீதிமன்றத்தின் சமூகக் கலவை இருக்கிறது. இத்தகைய முறையில் போதுமான பிரதிநிதித்துவம் இல்லாத தன்மையோடு உச்ச நீதிமன்றம் இருந்தாலும் சிறுபான்மையோர் உரிமைகளை பாதுகாப்பதிலும் இந்தியாவின் மதச்சார்பற்ற தன்மையை உயர்த்திப் பிடிப்பதிலும் நமது உச்ச நீதிமன்றத்துக்கு ஒரு வரலாறு இருக்கிறது என்பதே உண்மை.
ஆனாலும் அதிகாரமிக்க அமைப்புகளில் முஸ்லிம்களின் பங்கேற்பு கணிசமான அளவுக்கு இல்லை என்ற நிலை தொடர்கிறது. இத்தகைய அமைப்புகளில் ஓரளவு இருப்பவர்களின் எண்ணிக்கையும் குறைகிறது. இது, இந்தியாவின் பொதுவாழ்வில் அனைவரையும் உள்ளடக்கிய தன்மையும் அனைவரும் பங்கேற்கிற நிலைமையும் இருக்க வேண்டும் என்பதில் அக்கறை கொண்டவர்களை சங்கடப்படுத்துகிற சூழலாகவே இருந்துவருகிறது.
கிறிஸ்டோபர் ஜெப்ரோலொட், கில்ஸ் வெர்னியேர்ஸ்
நன்றி: இந்தியன் எக்ஸ்பிரஸ் (செப்டம்பர் 10, 2018)
தமிழாக்கம்: த.நீதிராஜன்

Write on திங்கட்கிழமை, 24 டிசம்பர் 2018

காவிரி கடலோடு கலக்கும் முகத்துவாரம் காவிரிப்பூம்பட்டினம் என அழைக்கப்பட்டு பூம்புகார் எனப் பெயர் பெற்றுள்ளது. நாகப்பட்டின மாவட்டத்தின் வடக்கில் வங்காள விரிகுடாக் கடலில் அமைந்துள்ள இவ்வூர் தமிழரின் பழம்பெருமையைக் கூறாமல் கூறும் ஊராகும்.

இவ்வூர் இரண்டாயிரம் ஆண்டுகளுக்கு முன் ஓர் உயரிய நகராக விளங்கியதை பட்டினப்பாலை, சிலப்பதிகாரம், மணிமேகலை ஆகிய இலக்கிய நூல்கள் தம் கவிவரிகளால் பேசுகின்றன.

இந்நகரின் துறைமுகத்தில் கட்டப்பட்டிருந்த தோணிகளை பட்டினப்பாலை குதிரைகள் என வர்ணிக்கின்றன. இந்த மரக்குதிரைகள் கட்டப்பட்டிருந்த துறையில் அன்று நூற்றுக்கணாக்கான அரபுக் குதிரைகள் வந்து இறங்கியுள்ளன.
இந்நகர் ஒரு சிறந்த நகருக்கான அடையாளங்களுடன் விளங்கியுள்ளது. இரவு பகல் எனப் பாராமல் இயங்கியிருக்கிறது. அல்லங்காடி, நாளங்காடி என சந்தை நகராய் விளங்கிய பெருநகரம் பட்டினப்பாக்கம், மருவூர்ப்பாக்கம் என இரு பகுதிகளாக இருந்தது.

இங்கு வாழ்ந்தோரின் மிகச் சிறப்பான வாழ்க்கையைப் பற்றி சிலப்பதிகாரமும் மணிமேகலையும் வர்ணிக்கின்றன. பல்வேறு மக்களும் பன்னாட்டுக்காரர்களும் வாழ்ந்ததை தம் பழம் நூல்கள் பறைசாற்றுகின்றன.
இந்நகரம் சிலப்பதிகார காலத்துக்குப் பின் ஏற்பட்ட ஆழிப்பேரலையில் மூழ்கடிக்கப்பட இன்று ஒரு மீன்பிடித்துறைமுகமாக மாறி விட்டிருக்கிறது.
திராவிட முன்னேற்றக் கழகம் ஆட்சிக்கட்டில் ஏறியபின் பூம்புகார் புனர் நிர்மாணம் அடைந்தது. பழையகால வரலாறுகளைக் கண்முன் கொண்டுவரும் வகையில் மாடங்களும் கூடங்களும் கட்டப்பட்டன. சிலப்பதிகாரம் கண்முன்காட்டும் இந்திரவிழா போல் ஆண்டுதோறும் அரசே விழா எடுத்தது. கவியரங்கம், பட்டிமன்றம், பாட்டு மன்றம் என பூம்புகாரில் கலைவிழா நடக்க நகரே விழாக்கோலம் கண்டது.
எல்லாம் சில ஆண்டுகளில் காணாமல் போக புதிய கட்டிடங்களும் சிதிலமடைய புத்தாக்கம் பெற்ற நகரம் மீண்டும் பழைய நகரமானது.

மீண்டும் அரசு விழாக்கள் எடுத்துக் கொண்டாட்டங்களைக் கொண்டு வருமானால் ஒதுக்குப்புறமாகக் கிடக்கும் பூம்புகார் உன்னத நகராக உருப்பெறும். பழையாறையிலிருந்து திருமுல்லை வாசல் வழியாக செயல்படத் தொடங்கியிருக்கும் கிழக்குக் கடற்கரைச் சாலை பூம்புகாரைத் தொட்டு தரங்கம்பாடி, காரைக்கால் செல்ல வேண்டும்.
பழையாறையிலிருந்து கிழக்குக் கரைச்சாலையில் நீண்டதூரம் ஊர்களே இல்லை. என்றாலும் அதன் கிழக்கில் கிடக்கும் நீண்ட கால்வாயும் அதற்குமேல் காணப்படும் சமூகவனமும் கருத்தில்கொள்ள வேண்டியவை. அவ்வனத்தில் நிமிர்ந்து நிற்கும் சவுக்குத்தோப்புகளும் பணிந்து கிடக்கும் முந்திரி மரங்களும் உருப்படியான காடு வளர்ப்புகள்.POOMBU 2
கடல்காற்று கட்டித்தழுவிப் பிரிய நிலக்காற்று சொந்தமுடன் உரசிச் செல்ல பிரியமான பயணத்தை அனுபவித்துக் கொண்டு பிரியாவிடை பெறும் பகுதி இது. மீண்டும் பூம்புகாரை நினைவுகூறும்.

பெருந்துறைமுகமாக விளங்க வேண்டிய பூம்புகார் இன்று நாகை மாவட்ட சட்டமன்ற தொகுதிகளில் ஒன்றாக உள்ளது. இந்த தொகுதியில் முஸ்லிம்கள் அதிகமாக இல்லாவிட்டாலும் பரவலாக முஸ்லிம்கள் வாழ்கின்றனர்.
1970 - 80 களில் பூம்புகாரில் ஒருமுறை முஸ்லிம் லீக் வென்றுள்ளது. அப்போதைய பூம்புகார் சட்டமன்ற உறுப்பினர் சகோதரர் சித்தீக், அக்கால கட்டத்தில் தமிழக சட்டசபையில் முஸ்லிம் லீகின் எட்டு பேர் சட்டமன்ற உறுப்பினர்களென எண்ணுகிறேன்.

அன்று ஒரே முஸ்லிம் கட்சி பனிரெண்டு இடங்களில் போட்டியிட்டது. புவனகிரியில் சகோதரர் அபுசாலி என்பார் சட்டமன்ற உறுப்பினராக இருந்தார். இன்று இயக்கங்கள் பலவாகி இரண்டு இடங்களைப் பெற போட்டி போட்டுக் கொண்டிருக்கின்றனர்.

பூம்புகாரை அடுத்துள்ள பெருந்தோட்டத்திலும் மணிக்கிராமத்திலும் கணிசமாக முஸ்லிம்கள் வாழ்கின்றனர். இவ்விரு ஊர்களில் மணிக்கிராமம் வரலாற்று ஆவணங்களில் இடம்பெற்றுள்ள ஊர்.
கி.பி. ஒன்பதாம் நூற்றாண்டு மணிக்கிராமம் கல்வெட்டுகளிலும் வரலாறுகளிலும் காணப்படும் வணிகப் புகழ்மிக்க ஊர்.
பூம்புகாருக்கு அடுத்திருக்கும் மணிக்கிராமத்தில் முற்காலத்தில் பெரும் வணிகர்கள் வாழ்ந்து அயல்நாடுகளில் புகழ் பெற்றிருக்கின்றனர். அக்காலத்தில் கீழைத்தேசங்களில் தமிழக வணிகர்களைக் குறிப்பிட மணிக்கிராமத்தார் என்ற வார்த்தையே பயன்பட்டிருக்கிறது.

தாய்லாந்து என வழங்கும் கயாம் நாட்டிலுள்ள தாக்குவாபா எனுமிடத்தில் கிடைத்துள்ள தமிழ்க் கல்வெட்டு ஒன்பதாம் நூற்றாண்டைச் சேர்ந்ததெனக் கருதப்படுகிறது. அக்கல்வெட்டில் ‘அவனிநாரணம்’ எனும் நீர்நிலையைத் தஞ்சை மாவட்டத்தைச் சேர்ந்த நாங்கூர்வேள் என்பான் அமைத்து மணிக்கிராமத்தார் என்ற வணிகக் குழுவினரின் பாதுகாப்பில் வைத்தான் என்று கூறப்பெற்றுள்ளது.

“அவனிநாரணம்” யாரைக் குறிப்பிடுகிறது ‘ஆட்குலாம் கடற்படை அவனிநாரனம்’ என நந்திக் கலம்பகம் குறிப்பிடும் மூன்றாம் நந்தி வர்மனின் பெயரால் நீர் நிலை அமைத்திருக்கின்றனர். நந்திவர்மனின் கடற்படை தென் கிழக்காசிய நாடுகளிலும் கால்பதித்திருக்கிறது. (ஆதாரம் : தமிழ்நாட்டு வரலாறு - பல்லவர் பாண்டியர் காலம் - முதல் பகுதி பக்கம் 202)
பூம்புகாருக்கு வடக்கே அமைந்துள்ள திருமுல்லைவாசல் கூட பழம்பெருமைமிக்க கடற்கரைப்பட்டினமாகும். இதன் முகத்துவாரம் கொள்ளிடத்திலிருந்து கிளை பிரிந்து வரும் சிற்றாற்றின் கரையில் அமைந்துள்ளது. நூற்றுக்கணக்கான படகுகள் தினந்தோறும் பாடாற்றுகின்றன. ஆயிரக்கணக்கான மீனவர்கள் கடலை அளக்கின்றனர். கோடிகோடியாய் மீன்கள் குவிகின்றன.
வடக்குப் பக்கத்தில் மீனவர்களின் குடியிருப்புகள் அமைந்திருக்க தெற்குப்பக்கத்தில் இருபகுதிகளில் கிழக்கும் மேற்குமாய் முஸ்லிம்களின் குடியிருப்புகள் அமைந்துள்ளன.

கிழக்கு மஹல்லத்தில் குத்பா பள்ளியைச் சுற்றி கணிசமாக முஸ்லிம்கள் வாழ்கின்றனர். மேற்கு மஹல்லத்தில் கிழக்குப் பகுதியை விட மிக அதிகமாக முஸ்லிம்கள் வாழ்கின்றனர்.

இங்குள்ள பள்ளிவாசலின் பெயர் ஜாமிஆ மஸ்ஜித் இதுவே நாகப்பட்டினம் மாவட்டத்திலுள்ள பள்ளிவாசல்களில் மிகப்பெரியது எனச் சொல்லப்படுகிறது. இதன் மேற்கே பழைய ஜாமிஆ மஸ்ஜித் இடிக்கப்படாமல் பாதுகாப்புடன் உள்ளது. பழைய பள்ளிவாசல் ஆற்காடு நவாப் காலத்தில் கட்டப்பட்டதாக கூறப்படுகிறது.
பழைய பள்ளிவாசலின் முன்னிருந்த முன்பு அகழாகப் பயன்படுத்திய பெரிய குளத்தைத் தூர்க்காமல் அதன்மேல் மிக உயரமான சிமெண்ட் தூண்களை எழுப்பி புதிய பள்ளிவாசலைக் கட்டியுள்ளனர். இது தமிழகத்தில் உள்ள பள்ளிவாசல்களில் எங்குமே இல்லாத ஏற்பாடு

.POOMBU 6
புதிய பள்ளிவாசலுக்கு 1982 இல் கால்கோல் விழாவும் 1991 இல் திறப்பு விழாவும் நடத்தியுள்ளனர். இதனை முஸ்லிம் லீகின் பெருந் தலைவர் அல்ஹாஜ் G.M.பனாத்வாலா MP திறந்து வைத்துள்ளார். இப்பள்ளியின் மினாரா குதுப்மினார் போல உயர்ந்து நிற்கிறது. இம்மினாரா மீனவர்களுக்குக் கலங்கரை விளக்கு போல் பயன்படுவதாக ஊர் மக்கள் சொல்கிறார்கள்.
ஆயிரக்கணக்கான முஸ்லிம்களின் எண்ணிக்கை கணக்கில் இருந்தும் மிகச் சிலரே ஊரில் வாழ்கிறார்கள். ஆயிரத்துக்கு மேற்பட்டோர் வெளிநாடுகளில் பொருளீட்டி ஊருக்கு வளம் சேர்க்கிறார்கள். மிகச் சிலரே சீர்காழி, சிதம்பரம், சென்னை என தொழில்புரிகிறார்கள். அரசு தனியார் தனியார் அலுவலகங்களிலும் பணி செய்கிறார்கள். உழைப்பாளிகளின் ஊர்.

திருமுல்லைவாசல் என்றாலே வரலாற்று ஏடுகளில் முல்லைமனம் வீசும், இவ்வூரின் வரலாறு ஆயிரங்காலத்துக்கு முன் என்றாலும் எல்லா முஸ்லிம்களின் ஊர்களைப் போலவே இதுவும் பதிவு பெறாத ஊர். வாய்மொழி வரலாறு கூட இல்லாத ஊர்.
ஏழாம் நூற்றாண்டுகளுக்கு முன் அரபுக்களாய் வந்தவர்கள் ஏழாம் நூற்றாண்டுகளுக்குப் பின் அரபு முஸ்லிம்களாய் வந்து குடியேறி வணிகம் செய்த தமிழக ஊர்களில் முக்கியமான ஊர் திருமுல்லைவாசல். சிலராய் வந்த முஸ்லிம்கள் கி.பி.1269 - இல் அரபுலக ஆட்சியில் நடந்த முரண்பாட்டால் கப்பல் கப்பலாய் குடும்பத்தோடு வந்திறங்கிய ஊர்களில் ஒன்று திருமுல்லைவாசல்.

காயல்பட்டினம், கீழக்கரை, தேவிப்பட்டினம், தொண்டி, அதிராம்பட்டினம், நாகை - நாகூர் என அரபுக்கப்பல்கள் நங்கூரமிட்ட போது அக்கப்பல்களில் ஒன்று திருமுல்லைவாசலிலும் தரை பிடித்தது. அக்கப்பல்களில் வந்தவர்களின் வாரிசுகளே தற்போதைய திருமுல்லைவாசல் மக்கள்.

நெய்தல் கடற்கரையில் முல்லையின் பெயர் கொண்ட ஊர். ஆராயப்பட வேண்டிய அழகிய பெயர்.
1269 - இல் வந்த அரபு முஸ்லிம்களில் பலரின் மணவழக்கம் மாப்பிள்ளை வீட்டோடு செல்லுதல், பெண்களுக்கே சொத்துரிமை. இப்பழக்கம் காயல்பட்டினம், கீழக்கரை போன்ற ஊர்களிலும் தொடர திருமுல்லைவாசலில் மாறியுள்ளதாகத் தெரிகிறது. பெருந்தொகையாக இருக்கும் முஸ்லிம்கள் அனைவருமே - ஷாஃபி மத்ஹபைப் பின்பற்றுபவர்கள் - வாப்பா வீட்டுக்காரர்கள்.
கடற்கரைப் பட்டினங்களில் பெரும்பாலும் வாப்பா வீட்டுக்காரர்களே வாழ்வர் என்ற என் கணிப்பை அண்மையில் நான் பயணம் செய்த புதுமடமும், கோட்டைப்பட்டினமும் பொய்யாக்கின. இவ்வூர்களில் பெரும்பாலும் ராவுத்தர்களே வாழ்கின்றனர். குதிரை வணிகம், பயிற்சி, வீரர் என வாழ்ந்த அவர்கள் மிருக வைத்தியர்களாகவும் திகழ்ந்துள்ளனர். சில ஊர்களில் வாப்பா - அத்தா வீட்டினர் என இரு தரப்பாரும் வாழ்கின்றனர். பிரிவினைகள் கிடையாது.

திருமுல்லைவாசலில் வாப்பா வீட்டுக்காரர்களே இருந்தாலும் அவர்களிடையே மிகச் சிலராக மாலிமார்கள் உள்ளனர். வழிகாட்டி, பேராசான் எனப் பொருள்படும் முஅல்லிம் (MUALLIM) என்பதே மாலிமார் எனத் தமிழ்ப் படுத்தப்பட்டுள்ளது.
நாகூரில் மாலிமார் தெருவென்றே ஒரு நடுத்தெரு இருக்கிறது. நாகூரிலும் நாகப்பட்டினத்திலும் காணாப்படும் மாலிமார் வகையறா திருமுல்லைவாசலிலும் உள்ளனர். மாலிமார் எனக் குறிப்பிட்டாலும் மற்ற முஸ்லிம்களோடு கொள்வினை - கொடுப்பினை செய்து சேர்ந்தே வாழ்கிறார்கள்.
தொடக்க காலத்தில் கப்பல்காரர்களாய் விளங்கிய நாகூர் - நாகப்பட்டின மரக்காயர்கள் போலவே திருமுல்லைவாசல் மரக்காயரும் கப்பல்காரர்களாகவும் வணிகர்களாகவும் விளங்கியுள்ளனர். அவர்களில் திருமுல்லைவாசல் சுல்தான் மரக்காயர் பேரும் புகழோடும் வாழ்ந்திருக்கிறார்.

பூம்புகார் பொலிவிழந்து போன பின் திருமுல்லைவாசல் ஏற்றுமதி இறக்குமதிகளில் கொடி கட்டிப் பறந்திருக்கிறது. கடலோர கப்பல் போக்குவரத்துகள் உச்சகட்டத்தில் இருந்த போது கல்கத்தாவுக்கும் தொண்டிக் கடற்கரைக்கும் மத்தியில் இடையில் தங்க்மிடமாக இவ்வூர் விளங்கியிருக்கிறது. மீண்டும் உள்நாட்டு கடல் போக்குவரத்து தொடங்குமாயின் பழவேற்காட்டுக்கும் தூத்துக்குடிக்கும் இடையே திருமுல்லைவாசல் முக்கிய இடத்தை வகிக்கும்.
சீர்காழியிலிருந்து கிழக்கே இருபது கல் தொலைவிலிருக்கும் திருமுல்லைவாசலுக்கு வடக்கேயுள்ள பெரிய முஸ்லிம் ஊர் புதுப்பட்டினம்.

தமிழகத்தில் நான்கு புதுப்பட்டினக்கள் உள்ளன. நான்கும் கடற்கரைக் கிராமங்கள். நான்கிலும் கணிசமாக வாழும் முஸ்லிம் பெருமக்கள்.

புதிதாக அமைந்த முஸ்லிம்களின் கடற்கரைப் பட்டினங்களுக்கு தானாக வந்த பெயர்தான் புதுப்பட்டினமாக இருக்க வேண்டும். தெற்கே ராமநாதபுரத்து தொண்டிக்கு அடுத்து அமைந்திருக்கும் புதியபட்டினம் புதுப்பட்டினம். பாண்டியரின் வாரிசுப் போரில் சுந்தரபாண்டியனுக்கு உதவ வந்த இலங்கைப் படை பாளையம் அமைத்த பட்டினமே பிற்காலத்தில் ஒரு புதிய பட்டினமாக வளர்ந்திருக்கிறது.

இன்னொரு புதுப்பட்டினம், தஞ்சாவூர் மாவட்டத்து மல்லிப்பட்டினத்துக்கு பக்கத்தில் அமைந்துள்ளது. மூன்றாவது புதுப்பட்டினம் காஞ்சிபுர மாவட்டம் கல்பாக்கத்துக்கு அருகில் அமைந்துள்ளது.

நாம் காணவிருப்பது நான்காவது புதுப்பட்டினம். இது நாகை மாவட்டம் சீர்காழி தொகுதியிலுள்ளது. திருமுல்லைவாசலுக்கு வடக்கே பத்துக்கல் தொலைவிலிருக்கும் புதுப்பட்டினம் கூட வாப்பா வீட்டுக்காரர்களைக் கொண்டது. இங்கு ஒரேயொரு பள்ளிவாசல் இருந்தாலும் முன்னூறு முஸ்லிம் குடும்பங்கள் வாழ்கின்றன.

கொள்ளிடத்தின் பாய்ச்சலால் வளம் கொழிக்கும் சீர்காழியின் கடைமடைப் பகுதி புதுப்பட்டினம். கொள்ளிட நீர்வழித் தடங்கள் கடலைத் தழுவுமுன் புதுப்பட்டினம் பகுதியில் பரந்த நீர்பரப்பாய் விரிந்திருக்கிறது. பார்ப்பதற்கு கண் கொள்ள காட்சி. கழுநீர் வண்ணத்தைச் சுற்றி சுற்றி பச்சை மரகதங்கள் பசுமை வயல்கள்.

POOMBU 10

கழுநீரைக் காணாமல் செய்யவும் மரகதப்பச்சையை மாற்றும் எண்ணத்தோடும் புதுப்பட்டினத்தில் பிரமாண்டமாய், டெல்லி ஏகாதிபத்தியத்தின் சதியால் எழுந்து நிற்கும் பிரமாண்டமான உலைகளும் கட்டிடத் தொகுதிகளும் வடவரின் வன்மத்தால் தஞ்சை - நாகை மாவட்டங்கள் தரிசாகிப் போய் விடுமா? கண்களால் பார்க்கும் நீர் நிலைகளும் கணகளைக் கவரும் மரகதப் பச்சை நிலங்களும் கடந்த கால காட்சிகளாகி விடுமா?

புதுப்பட்டின எரிவாயுத் திட்ட வானுயரக் குழாய்களிலிருந்து தீப்பற்றி எரிகிறது. எம்மைப் போன்றவர்கள் இதயங்களில் வேறொரு தீ பற்றி எரிகிறது. நாளை அனைவர் வயிறுகளிலும் எரியும். நஞ்சை - புஞ்சை வயல்கள் எண்ணெய் வயல்களாகியிருக்கும் சூழலில் நம் வருங்கால சந்ததிகள் என்ன ஆவர்?
கனத்த இதயத்தோடு புதுப்பட்டினம் கடற்கரைப் பக்கம் சென்று விட்டு வடக்கால் எனும் ஊர்ப்பக்கம் சென்றேன். வடகால் கூட முஸ்லிம்கள் பெருமளவில் வாழும் ஊரே.

இதற்கு வடக்கே அமைந்துள்ள நாகப்பட்டின மாவடத்து வட எல்லையில் உள்ள பழையாறை. பழையாறையில் முழுமையாக மீனவர்களே வாழ்கின்றனர். இங்கு மிக அதிகளவில் மீன்பாடு நடைபெறுகிறது. கடல்பருபொருளை குஞ்சு குருவிய்யொடு வாரியள்ளிக் கொண்டு வரும் மடிவலையால் இங்குள்ளவர்களுக்கும் கடலூர் தேவனாம்பட்டின மீனவர்களுக்கும் அவ்வப்போது கடல்போரும் தரை போரும் நடைபெறும் அவலம் மாறி வருகிறது.

கிழக்குக் கடற்கரைச் சாலை வெறும் பெயருக்குத்தான் கிழக்குக் கடற்கரைச் சாலை தமிழகத்தின் வடக்கு மாவட்டமான திருவாரூரின் கடற்கரைப்பட்டினமான பழவேற்காட்டிலிருந்து சென்னை வர கடற்கரைச் சாலையில்லை. ஆங்காங்கு துண்டு துண்டாய்க் கிடக்கிறது.

பழவேற்காட்டிலிருந்து சென்னை வர மேற்கே பொன்னேரி வந்து செங்குன்றம் சென்று தலைநகர் வர வேண்டும். தலையைச் சுற்றி மூக்கு..!
சென்னையிலிருந்து கடலூர் வர நேரான கடற்கரைச் சாலை உள்ளது. கடலூரைத் தாண்டும் போதே கிழக்குக் கடற்கரைச் சாலை மேலேறிச் சென்று சிதம்பரத்தை அடைய கடற்கரை கிழக்கே மிகத் தொலைவில் இருக்கும்.
மிகப்பெரிய பட்டினமான பரங்கிப்பேட்டை கிழக்கில் கிடக்க பிச்சாவரம் தாண்டி பெருந்தண்ணீர் தேசம். தண்ணீர்த் தேசத்தைத் தாண்டி பழையாறை - புதுப்பட்டினம் - திருமுல்லைவாசல் - பூம்புகார் - தரங்கம்பாடி வரை கிழக்குக் கடற்கரைச் சாலை எனச் சொல்லும் நீண்ட அகல தடைபடாத சாலையில்லை.

சிதம்பரம் - சீர்காழி என பயணித்து தரங்கம்பாடிக்குள் செல்லாமல் காரைக்காலை அடையும் வகையிலே சாலைப் பயன்பாடு உள்ளது.
கடலூரிலிருந்து கடற்கரைப் பகுதியிலேயே பயணித்து பரங்கிப்பேட்டையடைந்து பழையாறை தொடங்கி தரங்கம்பாடி வரும் உண்மையான கிழக்குக் கடற்கரைச் சாலை கட்டாயம் அமையும் காலம் வர வேண்டும். இப்போது அச்சாலையில் பயணிக்க முடியாவிட்டாலும் வருங்காலத்தில் நீங்கள் பயணிக்க முன் வாருங்கள்.
மண் வலம் தொடரும்…

Write on திங்கட்கிழமை, 24 டிசம்பர் 2018

மனித இனத்துக்கென வழங்கப்பட்ட ஒரு தனித்துவமான அருட்கொடை, “வாசித்தல்”. இது ஒருவரது சிந்தனையை செழுமைப்படுத்தி செயல்களை வீரியப்படுத்தும். வாசிப்பின் மீதுள்ள தொடர் ஆர்வம், தான் சார்ந்திருக்கும் சமூகத்தின் மீது மிகப்பெரும் தாக்கத்தை ஏற்படுத்தும். இதற்கு பல சான்றுகளை வரலாறு பகிர்ந்தாலும், சமகால வரலாறாய் நம்கண் முன்னே நிமிர்ந்து நிற்கிறது, ஜெர்மனியின் தலைநகரான பெர்லினில் அமைந்துள்ள “பைய்னடா (Baynada) அரபி நூலகம்”.
கற்றவர்கள் அதிகமிருக்கும் ஜெர்மனியில் ஒரு நூலகம் உருவாவதில் என்ன ஆச்சரியம் இருக்கிறது? எனத் தோன்றலாம். இந்த நூலகம் யாருக்காக? யாரால்? எப்படி உருவானது? அது என்ன செய்து கொண்டிருக்கிறது? என்பதில்தான் இதன் தனிச் சிறப்பு அடங்கியுள்ளது. இந்த நூலகத்தை உருவாக்கியவர்களில் மிக முக்கியமானவர், 2013-இல் சிரியாவிலிருந்து ஜெர்மனிக்கு தஞ்சமடைந்த ”முஹன்னத்” என்கின்ற ஒரு அகதி.
பல ஆண்டுகளாக அரபு மொழி பேசக்கூடிய மக்களுக்கு, ஜெர்மனி தாய்வீடாக இருந்த போதிலும், கடந்த சில வருடங்களாக சிரியாவிலும் ஈராகிலும் நடந்த போர்களால், அங்கிருந்து ஜெர்மனிக்கு தஞ்சமடைந்தவர்கள் எண்ணிக்கையில் அதிகமாகவிட்டனர். சொந்த மண்ணை விட்டு வந்தவர்களுக்கு இடமும், உடையும், உணவும் தருவதற்கு ஜெர்மனி அரசும், தன்னார்வ தொண்டு நிறுவனங்களும் முன்வந்தபோதிலும், அம்மக்களால் இதை கொண்டு நிறைவடைய முடியவில்லை.
அறிவுப்பசிக்கு அதிக முக்கியத்துவம் தரும் இவர்களை, “தன் சொந்த மொழியான அரபியில் புத்தகங்களை வாசிக்க முடியவில்லையே” என்கின்ற ஏக்கம் அதிகமாகவே ஆட்கொண்டது. அதிலும் முஹன்னத் அவர்களுக்கு இந்த ஏக்கம் அனலாய் பற்றியெறிந்தது. இவர் இலக்கியமும் மொழிப்பெயர்ப்பு கலையும் பயின்றவர், கூடவே சிரியாவில் ஏற்கனவே சொந்தமாக நூலகம் ஒன்றையும் வைத்திருந்தவர். போரின் காரணமாக அனைத்து புத்தகங்களையும் இவர் பிரியவேண்டியதாயிற்று.
தனது வாசிப்பு ஏக்கத்தை தணிக்க, முஹன்னத் அவர்கள், பத்திரிக்கையாளர் ”கேப்பர்ட்”- இன் உதவியை நாடினார். ஆனால் ஒட்டுமொத்த ஜெர்மனியிலும் அரபி நூலகமோ அல்லது அரபிப் புத்தகமோ ஒன்றுகூட இல்லை என்பதை அறிந்து மிகுந்த ஏமாற்றத்திற்கு உள்ளானார். தன் மனவேதனையை தான் சந்திக்கும் அரபி மொழி பேசும் மக்கள் அனைவரிடமும் முறையிட்டார். அதில் ஒருவர்தான் இசைக்கலைஞரான ”அலி ஹசன்”. இந்த பகிர்தல்தான் அரபி நூலகம் ஒன்றை ஆரம்பிக்க வேண்டும் என்ற எண்ணத்தை இவர்களுக்குள் உருவாக்கியது.
பதிப்பகத்தார் முதல் பொதுமக்கள் வரை அனைவரிடமிருந்தும் புத்தகங்களை சேகரிக்கும் பணி முஹன்னத் மூலம் படுவேகமாக நடைப்பெற்றது. சமூக வளைத்தளத்தின் பயன்பாட்டால், பல நாடுகளில் இருந்து புத்தகங்கள் வந்து குவிந்தது. மறைந்துபோனவர்களின் நினைவாக பாதுகாத்து வைத்திருந்த புத்தகங்களும் அதில் அடங்கும்.
நூலகத்திற்கான இடத்தை தேர்வு செய்வதை கேப்பர்ட் -ம், உள் கட்டமைப்பு மற்றும் இதர பொருள்கள் வசதியை ”தன்னா ஹேடாத்” என்கின்ற கட்டிடக்கலை மாணவரும் பொறுப்பேற்றுக் கொண்டனர். இப்படி 2016-இல் உருவான பைய்னடா அரபி நூலகம், நன்கொடையால் மட்டுமே நடத்தப்பட்டுவருகிறது.
வெறும் 700 புத்தகங்களோடு ஆரம்பிக்கப்பட்ட இந்த நூலகத்தில், இன்றுள்ள தலைப்புகள் மட்டும் 7500 ஆகும். கலை, இலக்கியம், விஞ்ஞானம், வரலாறு என எண்ணற்ற தலைப்புகளால் நிரம்பும் இந்நூலகத்திற்கு, புத்தகங்கள் இன்னும் வந்துக்கொண்டே இருக்கின்றது. இது அனைத்து வயதினருக்கும், கற்றலுக்கான வாசலை திறந்துவிட்டிருப்பதால், அரபு மொழி பேசக்கூடிய மக்களுக்கு மிகச்சிறந்த ஒரு நல்வரவாகவும், மாபெரும் மனஆறுதலாகவும் அமைந்திருக்கிறது.
இத்தோடு நிற்காமல், அகதியானதால் கல்வி தடைப்பட்ட மாணவர்களுக்கு தாய்மொழிக் கல்வி வழங்குவதல், புத்தக வாசிப்பிலும் விளையாட்டிலும் ஆர்வமூட்டுவதல் என தன் அடுத்த தலைமுறையை வளர்த்தெடுப்பதிலும் தனிப்பட்ட முறையில் இந்நூலகத்தில் கவனம் செலுத்தப்படுகிறது.
பைய்னடாவின் மிகமுக்கியமான குறிக்கோள், இந்நூலகம் அரபு மொழி மக்களுக்கு மட்டுமானது என்றில்லாமல் ஜெர்மனியின் அனைவருக்குமானது என்ற நிலையை எய்திட வேண்டும் என்பதுதான். அதற்காக அரபுமொழியின் நூல்களை ஆங்கிலத்திலும், ஜெர்மனிலும் மொழிப் பெயர்த்தார்கள். இது அரபு, ஆங்கிலம், ஜெர்மன் என அனைத்து மொழி மக்களையும் ஒன்றிணைத்து, தங்களது கலை, கலாச்சாரம், பண்பாடு ஆகியவற்றை பரிமாறிக்கொள்ளவதில் பெரும்பங்கு வகிக்கிறது.
ஐரோப்பாவில் பரவிவரும் அவநம்பிக்கையும், சகிப்பின்மையும் வேரறுக்கப்பட, உங்களுக்கும் எங்களுக்கும் இடையேயான பொதுதளத்தில் பயணிப்போம் என்கின்றது பைய்னடா நூலகம். இதனால் உண்டாகியுள்ள சமூகமாற்றம் காட்டற்று வெள்ளமாய் பரிணமித்துக்கொண்டிருக்கிறது.
வாசித்தல் என்ற ஒரேயொரு வார்த்தை மீதுள்ள தளாராத பற்று, சமூகத்தை பற்றிப்பிடித்திருக்கும் பல இன்னல்களை தளரவைத்துவிடும் என்பதற்கு பைய்னடா அரபி நூலகம் ஒரு அத்தாட்சி.

V R அப்துர்ரஹ்மான், தமிழ்நாடு முஸ்லிம் கல்வி இயக்கம்